Say it in WARAY: Aningal Tikang ha Huron Kan Iluminado Lucente

Aningal Tikang ha Huron

Kan Iluminado Lucente

Aadto kuno ha sawang

An damo nga kalipayan

Sadto kuno tirok

Ngatanan nga kaupayan.

Waray gud liliwon

Ngan waray gud kakawang

Ngan bis’ ano nga ungad’on

Han tawo didto ha sawang

Waray man daw ada didto

Panhune han katamsihan;

Waray didto mga maya

Mga sabong nga aranihan.

Ngan damay kabab’ihan

Burungyog panginoon

Ha bukid, mga patag

Ug ha mga hagnaon.

Ha amon pagkakablas

Waray gad pagtipa;

Ha sawang nga kabuhi

Waray ko man kaipa.

Kay dinhi may pagsanag man

Han adlaw ngan han bulan

Ngan dinhe an huyuhoy

Bulong han kaunlan